Die Fenstergucker: Juchendlische
von de Ginder “Die Fenstergucker”, Beobachtungen auf Hessisch
Im Covertext heisst es:
Für ein altes, eingespieltes Paar, ist der eigene Fensterplatz
die ideale Loge, über Façetten des Lebens zu philosophieren.
Lesen Sie hier, wie de Ginder den Nerv der Zeit trifft und lernen Sie Hessisch, denn es lohnt sich zu erfahren, wie so der Nagel auf den Kopf getroffen wird.
Diese Ansichten über Dönerfresser, Schwarzawweider, Erwwe, Juchendliche und
vieles mehr, kitzeln den Lachreiz und sind Wahrheiten, die nachdenklich stimmen.
Leseprobe: Juchendliche
Sie: Da gugg, äm Willi seun Tobias
Er: Der Griinschnawwel hat doch tatsächlisch ä Zigarett im Maul
Sie: Der iss doch erst fuffzee
Er: Wenn de Willi wüßt, daß der raacht, der däd aus-flippe
Sie: So aam däd isch’s Taschegeld sperrn
Er: Unn, was erreischste dademit? Nix, saach isch derr, dann geh’n die Paffer klaue
Sie: Gugg nur, wie der aach ärumleeft, Bomberjack unn Kopphörer im Ohr
Er: Wenn den ämol än Zuch üwwerfährt, der hört nedämol än Schlaach
Sie: Später ham se dann än Trinidus unn fraache sisch, wo des Pfeiffe herkommt
Er: Von dene ihr’ne Amimusik wirsde doch ganz bleed
Sie: Unn wenn der verstehe däd, was die Amis all für’n Scheiss zusammesinge, däd der erst rescht bleed wern
Er: Wenn der des verstehe däd, dann däd der seu CD zertrete unn in de Papierkorb schmeisse
Sie: Du maanst newwe de Papierkorb!
Er: Hast rescht, des iss ja heutzudaachs än Volkssport geworn – wie werf isch was in de Papierkorb, ohne’n zu treffe!?
Sie: Grad die Woch hat im Heimatbote gestanne, daß die Vereine uffgerufe sinn, an so äm Reinischungsdaach teilzunemme
Er: Reinischungsdaach?
Sie: Ei, die schwärme aus und sammele de Unrat in de Grünanlaache unn im Wald eu
Er: So weit käms noch, daß isch de Dreck von dene Dreckspatze wegmache däd, die sollte liewwer ma die Juchendlische zusammepfersche un dann ihr’n Dreck uffsammele lasse
Sie: De neueste Sport von dene Dreckspatze iss ja jetzt: Wie öffne isch mit äm gezielte Tritt de Bodedeckel von äm Papierkorb unn lass de ganze Abfall ärausfalle?
Er: Saach ma, hat’s sowas bei uns früjer gegewwe?
Sie: Mir sinn ja noch erzooche worn
Er: Du maanst also, daß de Willi den ned rischdisch erzooche hätt?
Sie: Wie de Herr, so’s Gescherr – gugg der’n doch aa, den Willi
Er: Was maanste dann?
Sie: Ei, der iss doch Alkoholiker
Er: De Willi?
Sie: Jetzt mach disch ned noch blöder, als de schon bist – der Willi schafft doch uff’m Bau
Er: Na und?
Sie: Die kippe doch locker än halbe Kaste Bier am Daach äweg
Er: Von der Sischt aus gesehe hasde schon rescht. Was soll aus dem Bub nur wern?
Sie: Gugg, do kimmt die Roth schon widder gerennt
Er: Die hat mer gradnoch gefehlt, des alde Plapper-maul
Frau Roth: Na, alles fröhlisch unn munter?
Sie: Hawwe se ewwe den Willi sein Tobias gesehe?
Frau Roth: Isch hab den schon gesehe, awwer die Juchend heutzudaachs sieht ja außer sisch gar nix mehr – kaan Gruß, nix mehr
Sie: Saach isch ja ewwe aach zu meim Eschon, daß die Juchend heutzudaachs kaa Maniern mehr hätt
Frau Roth: Unn zum Dank dodefer mäscht die Stadt jetzt ä Juchendhaus uff
Sie: Ei, wo dann?
Frau Roth: ‘S alde Gemeindehaus werd renoviert
Sie: Des iss de Dank, daß die Bagasch üwwerall die Papierkörb kaputt macht
Frau Roth: Nee, dess iss Taktik
Sie: Taktik?
Frau Roth: Ei, wenn die die Juchendlische in so Ju-chendhäuser locke, dann streune die ned vor Lange-weil in de Geschend ärum
Sie: Na, da wadde mer maa ab, wielang die des Juchendhaus uffhawwe – ‘s wird ned lang dauern, dann iss des alde Gemeindehaus abbruchreif
Frau Roth: Zumindest wird’s jetzt erst ma inne mit Graffiti schee eugesprüht
Sie: Dem Willi seu Gesischt meescht isch ma sehe, wenn dem seun Tobias ‘s Wohnzimmer so renoviern däd
Frau Roth: Hauptsach bundisch
Sie: Do, Frau Roth, gugge se nur ma rüwwer, was se mit dem Kleinschmitt seum Haus gemacht ham
Frau Roth: Isch hab’s schon gesehe, ‘s iss ä äschde Sauerei, was die do dran gesprüht hawwe
Sie: „Love your brother“ – wisse sie was des häsd?
Frau Roth: Seh isch wie än Dolmätscher aus?
Sie: Sauerei, wenischsdens könnte die ja Deutsch spraye, damit mer’s aach verstehe kann
Frau Roth: Da hawwe se rescht, awwer jetzt muß isch wieder
Sie: Na dann
Er: Macheses guud
Sie: Unn isch hab gedacht, die Roth hätt Abidur
Er: Kann ja ned ämol ä Fremdspraach
Sie: Ewwe
Er: Die iss genauso schlau wie mir aach
Sie: Ewwe