Ä haarisch Sach
von de Ginder (copyright)
Willi: Ei, wie dann?
Heiner: Prima un selbst?
Willi: Alles im Lot
Heiner: Na dann
Willi: Saach mo, worst du beim Frisör?
Heiner: Sieht so aus, gell, aber des hod mer meu Hermi geschnidde
Willi: Ned schlescht
Heiner: Fünfunzwanzisch Märker hab isch do geschpart
Willi: Nexdens komm isch aach zu deune Hermi un lass mer die Haarn schneide
Heiner: Isch hab nix degesche, wenn de ä ordentlisch Drinkgeld gibst
Willi: Awwer des Drinkgeld geht ned an die Hermi
Heiner: Nee, des geht an misch
Willi: Iss gebongt
Heiner: Awwer ned, daß de hinnerher meckerst, wenn´s ned schee werd
Willi: Kaa Sojje – wie seescht de Fuchs Norbert immer: Liewer ä Glatz, als
gor kaa Hoorn mer
Heiner: Dem sinn doch alle Hoorn ausgefalle, gell
Willi: Mittlerweile wachse die widder, des mit dem Hoorausfall, des iss von
der Schemotherapie gekomme
Heiner: Komm, erzähl nix, bei dem Ärscher dehaam sinn dem die Hoorn ausgefalle
Willi: Neea, dann müßt isch jo aach mit äm Tuppee ärumlaafe
Heiner: Hast halt ä dick Fell
Willi: Des brauchsde aach bei maaner Alden
Heiner: Waasde aach, wer sisch neuerdings die Hoorn färwwe läßt?
Willi: Wer?
Heiner: De alde Schneider Winfried
Willi: So en eitle Kerl
Heiner: Schafft halt uff ner Bank
Willi: Der mescht des, damit die Kundschaft ned denkt, der hod graue Hoorn,
do hod der bestimmt aach graue Zelle
Heiner: Gugg uns oo – mir ham aach graue Hoorn und schäme uns deswesche ned
Willi: Un die Zelle sinn aach noch ned grau
Heiner: De Schneider, der hätt sisch aach schon ämol liffde lasse
Willi: Woher waasde dann des schon widder
Heiner: Von de Stasi
Willi: Von de Stasi, komm jetzt veräppel misch ämol ned
Heiner: Iss jo nur ä Abkürzung für Stahlmüller Siegfried
Willi: Woher kennst dann du den?
Heiner: Isch hab ämol mit dem zusamme uff em Zimmer gelesche beim Bund
Willi: Du warst beim Bund?
Heiner: Bund der Wanderfreunde
Willi: Ach so, awwer wie kann dann de Stahlmüller wisse, daß de Schneider
sisch hod lifte lasse?
Heiner: Der hod gesaacht, daß de Schneider ä Gesischt häd, als wär em en Lift
drüwwer gefahrn
Willi: Des hod der awwer bestimmt anners gemaant
Heiner: Der hod des so gemaant, wie er´s gesaacht hod
Willi: Wenn de maanst
Heiner: Maan isch
Willi: Na dann – bis demnächst in daane Frisierstubb
Heiner: Un vergeß des Drinkgeld ned
Willi: Bestimmt ned
Heiner: Also dann
Willi: Machs guud
Heiner: Machs besser