Ä Vermißdeaanzeisch
von de Ginder (copyright)
Willi: Ja saach emol, wo kimmst du dann her?
Heiner: Von de Polizei
Willi: Von de Polizei?
Heiner: Ei, ja
Willi: Was hast´n du mit de Polizei am Hut?
Heiner: Isch hab ä Vermisdeaanzeisch gemachd
Willi: Wen vermißd de dann – etwa die Helma?
Heiner: Quatsch
Willi: Würd misch ja ned wunnern, wenn die eines Taches verschwinnde det –
uff nimmer widder sehn.
Heiner: Du glaabst doch ned, daß mei geliebd Frausche abhaue dud
Willi: Ei wor ja nur en Spaß
Heiner: Will isch awwer aach maane
Willi: Awwer jetzd saach endlisch, wen vermißnd du?
Heiner: Ei, mei Zeidung
Willi: Die Rundschau?
Heiner: Ei sischer
Willi: Kimmt die ned mehr?
Heiner: Seid drei Daach schon ned mehr
Willi: Merkwürdisch
Heiner: Sehr merkwürdisch
Willi: Un da gibst du ä Vermißdeaanzeisch uff?
Heiner: Ei sischer, isch vermiß die schon drei Taach
Willi: Hasde ja ewwe gesaachd
Heiner: Saach isch doch
Willi: Un was ham die uff dem Revier gesaachd
Heiner: Das die in dem Fall kaa Vermißdeaanzeisch uffnehme deede
Willi: Die faule Brüder
Heiner: Beamde
Willi: Beamde in Uniform
Heiner: Audoridäde
Willi: ja un dann hawwe die disch widder weggeschickd?
Heiner: Na, dann hab isch ewwe ä Diebstahlsanzeische gemachd
Willi: Hawwe se die dann wenischsdens uffgenomme?
Heiner: Zähneknirschend
Willi: Du bist halt en zähe Hund
Heiner: Do kenn isch nix
Willi: Dene hastes awwer gezeischd
Heiner: Ei, die solle mol was dun für ihr Pansion
Willi: Un was dun die jetzd
Heiner: isch hab gesaachd die solln sich emol uff die Lauer leesche
Willi: Ned dumm
Heiner: Dann wern mer schon sehe wer die Rundschau mitgehe läßt
Willi: Jetzd emol ä anner Fraach
Heiner: Un?
Willi: Hast du von dem Unfall in de Wittelsbacher Allee gehört?
Heiner: Ei sischer, de Waachner Kurt hat mers doch erzählt
Willi: Ei do is doch en Besoffene ins Kiosk vom Schäfer Franz gefahrn
Heiner: Un waast du ach wer des wor?
Willi: Waas isch ned
Heiner: Awwer isch
Willi: Ei, wer dann?
Heiner: Ei, de Winder Heinz
Willi: De Winder Heinz?
Heiner: Ei sischer
Willi: In de Rundschau stand, daß der jetzd im Krangehaus lieschd
Heiner: Selwwer schuld
Willi: Drei Komma Promill
Heiner: Führerschein ford
Willi: Sein Ford aach
Heiner: Scherzkeks
Willi: Totalschaade
Heiner: Kennst du den Winder Heinz?
Willi: Ei sischer
Heiner: Woher dann?
Willi: ei der träschd doch bei euch die Rundschau aus
Heiner: Ach ja
Willi: Ewwe
Heiner: Ach herjeminee
Willi: Was?
Heiner: Jetzd waas isch warum die Rundschau zur Zeit ned kimmd
Willi: Warum?
Heiner: Ei du Dussel, weil de Winder Heinz im Krankehaus lieschd
Willi: Koma
Heiner: Un die hawwe noch kaan gefunne der den ersetzd
Willi: Traaisch
Heiner: Für de Winder Heinz
Willi: Na, für disch
Heiner: Ei, wieso für misch?
Willi: Ei weil de jetzd die Vermißdeaanzeisch zurück ziehe mußt
Heiner: Diebstahlsaanzeische
Willi: Rischdisch
Heiner: En Deiwwel werd isch dun
Willi: Du willst die Aazeisch ned zurückziehe?
Heiner: Niemols
Willi: Ei warum dann ned?
Heiner: Ei, mol sehe, ob die selwwer druffkomme, das de Winder Heinz im Koma
is
Willi: Do bin isch ja gespannd
Heiner: Un isch erst
Willi: na dann – isch wünsch der was
Heiner: Gleischfalls
Willi: Bis demnächd
Heiner: Aliwidertschi