Aktzijefiewwer
von de Ginder (copyright)
Willi: Moin mein Liewwer
Heiner: En wunnerscheene
Willi: Wo meschsdn hie?
Heiner: Zum Wasserhäusje
Willi: Hasde widder kaa Rundschau gekrischd?
Heiner: Naa, isch hol mer mei Börsezeidung – Börse-Onlein
Willi: Börsezeidung?
Heiner: Ei, isch muß doch jetzt immer uff du däd sei
Willi: Ei, bisd du jetzt unner die Aktzijebesitzer gegange?
Heiner: Ei sischer
Willi: isch wird verrigd, de Heiner un Aktzije
Heiner: Ei wos is dann so schlimm do dran?
Willi: Des is doch nur wos für Leut mit em Haufe Kohle
Heiner: Maansd du isch hätt ned aach ä por Grosche?
Willi: Saach emol ehrlisch Heiner, viel Aktzije kannst du doch ned awwe, oder hasde im Loddo gewonne?
Heiner: Ei du Dabbes, mer muß doch ned gleisch hunnerde von Aktzije kaafe
Willi: Ach so
Heiner: Mer kann ja aach nur aa Aktzije pro Firma kaafe
Willi: Awwer mit nur aaner Aktzije – wos soll dann do debei ärausspringe?
Heiner: Ja mindestens was umsonst zu futtern
Willi: Hä?
Heiner: Ei Willi, jetzt stell disch doch ned so doof o
Willi: Heiner – jetzt red doch ned so wie ä Tür mit siwwe Sieschel
Heiner: Also mol de Reih nach
Willi: Aans nach em annern
Heiner: Isch kaaf von alle solvende Firme in Frankfort unn Umgewung ä aanzisch Aktzije. Natürlisch derf die ned so orsch viel koste, wie zum Beispiel die von de SAB, die kostet ja bald 800 Märker oder von dem Hugo seine Buud, dem Hugo Chef sei.
Willi: Isch versteh´s jetzt – du sammelst Aktzije wie annern Briefmarke
Heiner: Na, du Döskopp, die Sach is anners. Die Firme, die müsse doch amol im Johr so ä Versammlung mache und deswesche bin isch bei dene Mitglied
Willi: Un da gehsd du hin?
Heiner: Ei sischer und die Erna geht aach mit
Willi: Derf die des ohne Aktzije?
Heiner: Ei klar, die krieschd e Besucherkarde ausgestellt
Willi: Von dir?
Heiner: Ei Willi, doch ned von mir – von dene hübsche Mädscher oder dene gestriegelde junge Leud dort
Willi: Du gehst doch ned wesche de junge Mäusjer dort hie
Heiner: Ei was – wesche dem kalde Büffee
Willi: Is des dann kostenlos?
Heiner: Logisch
Willi: Un do geht ihr hin um euch durchzufuttern?
Heiner: Verrods ned, awwer mir hamm aach Plastikdudde debei und wenn kaaner gugd, do stecke mer noch wos für dehaam eu
Willi: Un des alles mit nur aaner Aktzije?
Heiner: Sischer
Willi: Die sinn awwer ganz schö blöd, die derfde eischendlisch pro Aktzije nur aa beleschd Brötschjer rausgewwe
Heiner: Die schnalles halt ned
Willi: Un wieviel verschiedene Firme kannst de dann jetzt jed Jahr besuche?
Heiner: Momendan hab isch erst acht Stück, awwer isch such mer noch mehr raus
Willi: Un deswesche holst du der jetzt die Zeidung
Heiner: Ei klar, isch such mer nur Firme raus, die aach gute Brötscher verdiene
Willi: Sonst könnds bassiern, daß du hikimmst un es gibd nix zu futtern, weil´s dene schlecht geht
Heiner: Rischdisch erkannt mein Liwwer – geht’s dene guud, geht’s aach mir guud
Willi: Saach mol Heiner, kannst du misch ´ned aach emol uff Gästekarde mitnemme?
Heiner: Ei klar, awwer ob de do dursch die Gesichtskontroll kimmst?
Willi: Lasse die ned jeden rei?
Heiner: Ei wor ja nur en Spaß
Willi: Alder Spaßvochel
Heiner: Awwer en Ozuch mußde schon oziehe
Willi: Klar, isch zieh den schwarze o, denn isch immer uff Beerdischungen ozieh
Heiner: Un e Krawad
Willi: Kann isch mer jo noch aa kaafe
Heiner: Des is ä Investition, die sisch lohne wird
Willi: Ä was?
Heiner: Des is Geld des widder reikimmd
Willi: Besser wie ä Sparbuch
Heiner: Logisch – Aktzije des is ä modern Geldanlaache, wer leeschd sei Geld noch uffs Sparbuch, bei dene Zinse
Willi: Nadurale Zinse, das do ned mehr druffkomme?
Heiner: Komme hald nur die Klewwersde druff
Willi: Du bist halt verdammt klewwer
Heiner: Mer muß sehe wo mer bleibt
Willi: Also bis demnächsd uff so ner Versammlung
Heiner: Un vergiß die Plastikdudde ned
Willi: Isch schreib mers hinners Ohr
Heiner: Machs guud
Willi: Machs besser