Animatöse
von de Ginder (copyright)
Willi: Ei guude
Heiner: Guude
Willi: Wasd du wos mir de Keller Andon erzähld hod?
Heiner: Nee
Willi: Der had gesaachd, das ihm de Dreher Karl gesaachd hod, daß dem Vetter
Hans sei Dochder ä Animierdam wär
Heiner: Des gibds doch ned
Willi: Ei wenn isch ders doch saach
Heiner: Dem Vetter Hans sei Dochder un Animierdam, des kann isch mer beim besde Wille ned vorstelle
Willi: Ei isch aach ned, aber des wär so
Heiner: Do kannsde mol sehe – gibsd dene Kinner die best Ausbildung und wos wird aussenne?
Willi: Ä Mädsche aus gutem Haus, sozusaache
Heiner: Do is mer hald ned devor gefeid
Willi: Ä Schand is des
Heiner: Furschdbar
Willi: Schreklisch
Heiner: Un wo animierd die dann, womöschlisch aa noch in de Breidegass?
Willi: Nee, die wär im Ausland in so nem Klub tädisch
Heiner: Edelpuff, hä?
Willi: Siehd so aus – Klub Aldi oder so, had de Karl gesaachd
Heiner: Nobelabsteische für Aldikunde
Willi: Mach kaa Witz
Heiner: Mach isch jo gar ned
Willi: Aldi hod doch ganz annern Läde
Heiner: Schon guud – awwer, daß die sowas mäschd, isch kanns ned glauwwe
Willi: Animateurin , ned zu glauwwe
Heiner: Animatöse, wenn schon
Willi: Aldiana, jetzd fällt mers widder ei
Heiner: So häsd der Club?
Willi: Ja – Furschdbar
Heiner: Schrecklisch
Willi: Machs guud
Heiner: Machs besser