Blutspende
von de Ginder (copyright)
Willi: Ei, de Heiner
Heiner: Ei Willi, wie dann?
Willi: Bestens, wie immer
Heiner: Schee zu höre
Willi: Wo kimmsde dann her?
Heiner: Isch wor Blutspende
Willi: Ach komm, du?
Heiner: Ei warum dann ned!
Willi: Find isch guud, doch
Heiner: Werd doch gebrauchd, des Zeusch
Willi: Un wie
Heiner: Eewe
Willi: Wos bezahle die dann pro Lidder?
Heiner: Ei Willi, nix bares, ´s werd in Naduralie ausbezahld
Willi: Wos hasdn kried?
Heiner: Vorneweg soviel zu trinke, wie de willst und hinnerher aach und dezu gabs ä Wörschtsche und den Beudel hier mit de Keks
Willi: Ned schlecht, soviel Bier trinke wie mer will
Heiner: Ei doch kaa Bier, Saft und Wasser und Kaffee und so ä Zeusch
Willi: Ei do lohnd sich des ned für misch
Heiner: Denk doch ned immer an disch ´s iss doch für en guude Zweck
Willi: Hasd jo reschd
Heiner: Un außerdem wird do deu Blut aach unnersuchd, ob de ned en Tribber hosd oder Äz
Willi: Ei Heiner, du wärsd doch ka Äz hawwe
Heiner: Mer waas es ned
Willi: Du hasd doch en solide Lewenswandel
Heiner: Ei sischer, awwer wisse due, ob mer Äz hod oder ned, des was mer erst nach dene ihrne Unnersuchung, ei weil die des Blut sofort aussordiern däde
Willi: Isch wolld´s gor ned wisse, wenn isch Äz hätt, do ded isch mer bloß Sojje mache
Heiner: Oostecke könnsd du eh kaan mer
Willi: Awwer hallo, kaane Verleumdunge, mei Erna könnd isch schon noch aastecke
Heiner: Könne und derfe is en Unnerschied
Willi: Wolle und ned wolle aach
Heiner: Wasd du, wen isch bei de Blutspende getroffe hab?
Willi: Woher soll isch des dann wisse?
Heiner: Ei, de Schramm Peter
Willi: De Schramm Peter?
Heiner: Wenn isch ders saach
Willi: Awwer Heiner, der iss bestimmd ned zum Spende higegange, der wollt sich en Liter verpasse lasse
Heiner: Do hasde reschd, aber der hod tatsächlisch gespend
Willi: Isch waas warum
Heiner: Warum?
Willi: Der wollt sei Blut nur uff Äz unnersuche lasse
Heiner: Könnd sei
Willi: Hunnerdprozendisch – der had doch dauernd anner Weiwwer
Heiner: Isch hab do Dinger von dem gehört, mein lieweer Freund
Willi: Un isch erst – der fährd zum Beispiel jeden Urlaub nach Thailand wesche de Weiwwer
Heiner: Mit Drooche soll der aach schon emol wos zu dun gehabt hawwe
Willi: So wie der aussieht hod der hunnerdprozendisch wos mit Drooche zu dun
Heiner: Würd misch jedenfalls ned wunnern
Willi: Misch aach ned
Heiner: Awwer das se den aach noch geehrt hawwe, beim Blutspende, des iss schon merkwürdisch
Willi: Fier wos dann geehrt?
Heiner: Für sei Fuffzischsde Spende
Willi: Orsch ufffällisch
Heiner: Wasde wos isch denk?
Willi: Naa
Heiner: Isch denk, der läßt sich ständisch kontrolliern. So wie die Weiwwer von de Breidegass immer beim Gesundheidsamt aadanze misse, so tanzt der bei de Blutspende aa un läßt sich haamlisch kontrolliern
Willi: Ned dumm der Kerl
Heiner: Un mer krieschd noch wos zu futtern
Willi: Der waas hald wie mers meschd
Heiner: En eschde Schlawiner, awwer jetzd muß isch haam, meu Alde ward midem Esse uff misch
Willi: Wos gibds dann heut?
Heiner: Blutworschd
Willi: Scherzkeks
Heiner: Spaß muß seu
Willi: Na dann machs guud, Spaßvochel
Heiner: Machs besser