Briefwahl
von de Ginder (copyright)
Heiner: Ei, de Willi
Willi: Ei guge mol do de Heiner
Heiner: Gell do gugsde
Willi: long ned geseehe
Heiner: Ewischkeide sinn des her
Willi: Jahrhunerde
Heiner: Unn? Was meschst´n so?
Willi: Briefwahl
Heiner: Ei, wieso dann des?
Willi: Ei, do kann isch dahaam in aller Ruh guge, ween isch bei de Eurobawahl wähle kaan
Heiner: Ned dumm
Willi: Ei seh isch so aus?
Heiner: Verträschstde die Worheid?
Willi: Ei, dumm sann doch die, die die falsche wähle
Heiner: Ei ja, es gibd so viel Dumme, die erreische jezd schon üwwer Fufzisch Prozend
Willi: Ei un deshalb gug isch emol genau uff die Lisd do
Heiner: Un, hasde schon was guudes gefunne?
Willi: Ei klaa, isch wähl die Bauernbardei
Heiner: Bauernbardei?
Willi: Ei sischer, die kenne jed Stimm gebrauche
Heiner: Awwer warum dann grad die?
Willi: De Wachner Kurd had mer die empfoohle
Heiner: De Kurd?
Willi: Der kennt sisch aus
Heiner: Der?
Willi: Ei, der is doch en Studierde
Heiner: Un die kenne sich aus?
Willi: Ei klar
Heiner: Un was had der gesaachd?
Willi: Der had gesaachd, das die große Bardeije nur ihrne Doofköpp naach Belschie schicke due
Heiner: Des versteh isch ned
Willi: haab isch aach ned ferstanne
Heiner: Erklär mol
Willi: Also, der had gesaachd, das kaan normale Mensch nach Belschie gehe deed, ei weil dord im Eurobabarlamend nix gescheides gemescht werd
Heiner: Ei was solle die dord aach mache?
Willi: Ewwe
Heiner: Abkassiern
Willi: Do hasde rescht
Heiner: immer
Willi: Un de Kurd kennd sisch aus
Heiner: Awwer wieso schigge die nur Doofe do hin
Willi: Ei dann sinn die die hier los
Heiner: Ned dumm
Willi: Des is, als ob de im Fußball von de erschde Mannschaft in die SOMA kimmst
Heiner: Du maanst, mer rennt net mehr so schnell, mer schald en Gang runner?
Willi: Genau, des sinn alles Herzinfagdkandidade un die dürffe net so uffdrehe
Heiner: Du maanst, des sinn alles alde Scheindoode?
Willi: ei logisch
Heiner: Ei jetzd kapier isch des erst
Willi: Alles rostische Näschel
Heiner: Jetzd waas isch aach, warum die Wahlbedeilischung immer so gering iss
Willi: ei , warum dann?
Heiner: Ei weil es ned so viel Rendner gibbd, wie´s Wahlberechtische gibbt
Willi: Do muss isch awwer lache, stell der e mol vor, es gäb nur rendner
Heiner: unn dann?
Willi: Ei dann ded die Bagasch mid Hunnerdprozend ihr Leud wähle
Heiner: Awwer mir dun dagesche halde
Willi: Mir halde dagesche
Heiner: Un was wähle mer?
Willi: ei die Bauernbardei
Heiner: Ei, sinn des ned aach alde Knöpp?
Willi: de Kurd seeschd, des sann die Aanzische, die mer wähle könnd
Heiner: Ei wieso des dann?
Willi: Die deede unser Inderesse am beste verdreehde
Heiner: Un wie mache die des?
Willi: Die gugge, das die Schnidsel ned so deuer wern
Heiner: Des find isch guud
Willi: Ei stell der e mol vor, e Schnidsel kosd aan uff de anner dach zähe Marg?
Heiner: des wär e Kadastroof
Willi: Ewwe
Heiner: Mei Helma ded ausrasde
Willi: mei Hilde erst..
Heiner: .. deshalb Bauernbardei
Willi: Damit die Weiwwer ned ausrasde
Heiner: Genau, damid mer in ruh unser Bierscher bei de Spordschau dringe kenne
Willi: So isses
Heiner: ohne dauernd zu höre: Heiner, dring net so viel, mir müsse spaarn, weil des Schweinefleisch so deuer geworn is
Willi: oder des Rindfleisch
Heiner: oder des Kalbfleisch
Willi: oder des Ziescheledder
Heiner: ned vorzustelle, wenn e handdasch zwaahunerd Mark kost
Willi: Wem erzählsde des?
Heiner: wasde was isch jezd mach?
Willi: Nee
Heiner: Briefwahlunnerlaache hole
Willi: do hasde reschd
Heiner: Ei, mir sann doch ned doof
Willi: Mir ned
Heiner: Mir sehn uns
Willi: Wo?
Heiner: Ei am Sonndach
Willi: Ei wo dann?
Heiner: Ei im Wahllokal
Willi: Wenn de willst
Heiner; Ei, um dord de Umschlach abzugewwe
Willi: ei was dann für´n Umschlaach?
Heiner: Ei, den für die Briefwahl
Willi: Ei klaar, isch Deppel
Heiner: Bis zum Sonndach
Willi: Bis dann
Heiner: Mach´s guud
Willi: Mach´s besser