Die Fenstergucker: De Ortsfunk
von de Ginder (copyright)
Sie: Da gugge ma, die alde Brüch iss wieder von de Kur zurück
Er: So wie die geht, had die Kur awwer nix genutzt
Sie: Des wär ja aach ä Wunner, wenn die was genutzt hätt
Er: Genutzt hat die Kur eh nur dene dort angesiedelte Ärzt
Sie: Kaa Wunner, wenn die von unserer Rente so hohe Krankekassebeiträsch erhewwe
Er: Do gugg, des alde Schnattermaul von Roth labbert der Könisch die Ohrn voll
Sie: Wenn de der was erzählst, was es ä Stunn später die ganz Stadt
Er: Des ist halt de drahtlose Ortsfunk
Sie: Des gibt’s doch ned, guggemol, die Ott krieschd esse uff Räder
Er: Ned nur, daß bei der im Gadde des Unkraut zu blühe aafängt, jetzt iss die aach noch zu faul zum koche geworn
Sie: Des kann doch ned schmecke, was die do aaliefern
Er: Der Slogan esse uff Räder müßt eischendlisch “Tod uff Rate” heiße
Sie: Bestimmt dun die des verseuchte Fleisch in so Küche liefern
Er: Sozialverträglicher Abgesang nenn isch sowas
Sie: Do guck, de Ortsfunk kimmt uff direktem Wesch zu uns
Er: Gudde Morsche Frau Roth
Frau Roth: Guude Morsche.Habders schon gehört, de Winkler Rudi had heut Morsche die Löffel abgegewwe
Sie: Saache se bloß, wie dann des?
Frau Roth: ´s Herz!
Sie: Awwer der hat doch en Herzschrittmacher gehabbt
Frau Roth: Aan Moment ä Fehlfunktion und baff, do leihsde
Sie: Isch saach ja immer “Fluch der Teschnik”, des hadder nu dadefo
Frau Roth: Wißt ihr schon, wer gestern de Führerschein abgewwe mußt?
Sie: Ei, wer dann?
Frau Roth: Em Scheitler sein Jüngste
Sie: Iss der widder emol besoffe gefahrn?
Frau Roth: So isses
Sie: Des mußt ja ma so komme, vielleischt lernt er was debei
Frau Roth: Des glawwe se doch selbst ned, daß mer dem noch was beibringe könnt
Sie: Ma unner uns, awwer was soll dann aus so Kinner wern, wenn de Alde ä kriminell Vergangeheit hat?
Frau Roth: Wie der Herr, so´s Gescherr
Er: Was had dann der für ä kriminell Vergangeheit?
Sie: Ei bei dem war doch die Steuerfahndung
Er: Awwer isch dacht, des Verfahrn wär niedergeschlaache worn?
Sie: Na und?
Frau Roth: So, isch muß noch beim Aldi vorbei, die hawwe heut Woll im Aagebot
Sie: Na dann, en scheene Taach noch
Er: En wunnerscheene
Frau Roth: Adele
Sie: Gugg, rennt die in de Aldi, wesche ä paar Wollknäuel
Er: Die soll ja ganz besonners geizisch seu
Sie: Des kannsde laut saache. Die wart manschmaa am Samsdaach beim HL-Markt ab halb zwaa und wart, wann die verderblisch Waar schnell noch ärunner gesetzt wird
Er: Ei, woher waasd´n des schon wiedder?
Sie: Ei, isch war halt grad aach zufällisch mo dort
Er: Eischendlisch könnde mer mo wiedder esse gehe
Sie: So weit kimmt´s noch. So lang isch noch uff de Baa stehe kann, koch isch uns aach noch was
Er: Wos kochsde dann heut?
Sie: Ä Suppehuhn – war im Aagebot
Er: Schon widder?
Sie: Ja du deddst die Rente mit volle Händ ausem Fenster werfe. Wenn´s nach dir ging, dede mer in Kur fahrn, dede im Feinkostlade eukaafe, dede ´s Geld in die Wertschaft traache un dene Wirtsleut ihrn Mercedes finanziern.
Er: ´s geht jo gar ned nach mir
Sie: Ewwe, zum Glück.