Die Fenstergucker: Lichtallergie-Kure
von de Ginder (copyright)
Sie: Merkwürdisch, die Dietrich hat ihrn Lade noch gar ned hochgezoche
Er: Jetzt wodes sächst, fällt mer dess aach uff
Sie: `S werderer doch nix passiert seu?
Er: Soll isch die Polizei aaruffe?
Sie: Wart liewwer noch ä bissi, dann gehsde ärüwwer un klingelst ämol bei derer
Er: Bei äm Herzinfakt, do zählt jed Minut
Sie: ‘S muß ja ned gleisch än Herzinfakt seu
Er: Klar, ‘s könnt aach ä Lischtallergie seu
Sie: Ä was?
Er: Ei des, was die Hannelor do in Oggersheim gehabt hod
Sie: Ach so, du maanst, die Dietrich häd sowas jetzt aach gekriescht und sitzt im Dunkele ärum
Er: Könnt ja seu, mer waas es ned
Sie: Heutzudaachs ist alles möchlisch, mansche Krankheide breide sisch ja empide….äh rasend schnell aus
Er: Du maanst epedemiemässisch
Sie: Genau dess maan isch, so wie Ääds oder des Lasso Fieber
Er: Lassa, wenn schon
Sie: Ei, sach isch doch. Awwer stell der ämol vor, du dädst so ä Lischtallergie krieje, was dädstn da mache?
Er: Des wär werklisch die schlimmste Krankheit, die isch kriesche könnt, do könnt isch ja gar ned mehr mit dir hier am Fenster sitze
Sie: Dess glaab isch derr uffs Wort, des wär werklisch schlimm.
Er: Ob de Heino aach so ä Allergie hat?
Sie: Wie kimmsde dann jetzt do druff?
Er: Ei, weil der doch immer so ä dunkel Sonnebrill uffhad
Sie: Dess könnt schon seu. Dess iss eichentlisch die Idee für so Lischtpatiende, Sonnebrill uff und ferdisch
Er: Kannste mal sehe, mir komme do uff Abhilfe un die Hannelor, die Kanzlergattin, die bringt sisch gleisch um, ohne ma nachzudenke
Sie: Waasd du was isch denk?
Er: Ei was dann?
Sie: Isch glaab, das des mit der Lischtallergie nur so än Vorwand war, damit mer von dere ihre Depressione abgelenkt werd
Er: Ewwe, dess glaab isch aach
Sie: Wenn isch dem Kohl seu Hannelor gewesse wär, wär mers vielleischt aach so gegange. De ganze Daach allaa, der Kerl dauernd unnerwegs Spende sammle, do kann mer schon vereinsamme
Er: So wie de Herzoch
Sie: Was für’n Herzoch?
Er: Ei, de ehemalische Bundespräsident Herzoch
Sie: Ach so, ja, die Männer, kenne awwer aach ohne Fraa ned existiern
Er: Ei des waas de Herrgott aach und deshalb gibt’s aach viel mehr Witwe als Witwer
Sie: Ob der Kohl sich aach wieder ä neu Fraa zulescht?
Er: Ei sischer, der wird bestimmt aach ned koche kenne, wie de Herzoch
Sie: Awwer ‘s iss schon erstaunlisch, wie schnell de Herzoch sei geliebte Christiane vergesse konnt
Er: Wo’s doch haast, daß Liebe ewisch wärt
Sie: Du dädst dir bestimmt aach nach aam Jahr ä anner nemme, wenn isch dod wär
Er: Ei, isch kann doch aach ned koche, soll isch vielleischt verhungern?
Sie: Isch hab immer gedenkt, daß du misch liebst?
Er: Ei, isch lieb disch ja
Sie: Aans kann isch derr saache, wenn isch vor dir sterwwe sollt und isch seh vom Himmel aus, daß du ä anner nach mir nimmst, dann kannsde was erlewwe, wenn de do äruffer kimmst
Er: Ok, isch verspresch derr, isch werd mer kaa anner nemme. Isch kann mer ja aach Esse uff Räder komme lasse
Sie: Des iss ä guud Idee, do bisde dann aach viel schneller wieder bei mer, bei dem Fraas
Er: Na, dann mach isch liewwer än Kurs beim Volksbildungswerk
Sie: Du bist heut ganz schö fresch
Er: Awwer nur ä bissi
Sie: Da gugg, de Dietrich ihr’n Sohn sperrt’s Tor uff
Er: Der guggd halt nach seuner Mutter – gugg, der zieht jetzt alle Rolläde hoch
Sie: Unn jetzt geht der aach schon widder
Er: Vielleischt iss die in Urlaub gefahrn!?
Sie: Ach, stimmt ja, des had die mir ja letzt Woch erzählt. Die iss in Kur.
Er: Kann mer dann Lischtallergieä in de Kur heile?
Sie: Lischtallergieä kann mer ned heile
Er: Wieso fährt die dann in Kur?
Sie: Kasse schädische, was sonst
Er: Des gehört werklisch verbode
Sie: Was?
Er: So Lischtallergie-Kure
Sie: Do hasde reschd