Die Fenstergucker: Mit zwaa Euro komme die ned weit
von de Ginder (copyright)
Sie: Da gugg, Familie Bäcker on Tour
Er: So bescheuert müßt isch seu unn misch uff so Inleidskäts stelle
Sie: Die Zeide wern immer verriggder. Gestern sinnse mit ihrne bleede zusammeklappbare Roller gerollt, heut rolle se mit de Inleidskäts und moje?
Er: Moje springe se Banschi-Seil
Sie: Un üwwermoje fange se Krokodile im Haifischbecke
Er: Oder Höhletauche
Sie: Höhletauche, dess würd zu dene passe – unn hinnerher de Ausgang ned finne
Er: Höhletauche mit Inlineskäts, des wär doch was, des müßt mer sisch eutraache lasse, do wo merr neue Ideen zu Gold mäscht
Sie: Namenssischerung oder wie dess häsd
Er: Was waas dann isch wie die des nenne, jedenfalls verdiene sisch do mansche dumm und dümmer mit so Eintraachunge, ohne än Finger krumm zu mache
Sie: Wenn’des schon säächst, gugg mo, wie sisch der Bäcker krumm mäscht – pass uff gleisch fliescht’er uff die Fress
Er: Oooh, des tut weh, du bist än rischdische Hellseher
Sie: Von wesche Hellseher, isch bin aafach nur än Menschekenner
Er: Awwer hauptsach dadebei seu – do nimmt merr schon ä paar blaue Flecke in Kauf
Sie: Aafach lächerlisch iss des – un des End vom Lied iss ja oft, daß unser Krankekass dene ihrne tolldreiste Ausflüsch teuer bezahle muß
Er: Stimmt. Unn mir Rentner, mir sinn die Deppe, mir könne des aus Solidarität mitbezahle
Sie: Solidargemeinschaft, daß isch ned lach, die aane fahrn Rollerskäts und die annern bezahle dodefer
Er: Apropo bezahle, da gugg nur, de Schäfer Franz sammelt widder für die Caritas
Sie: Amol im Johr mäscht der seu Tour
Er: Isch hol schon ämol ‘s Bortmonee, der kimmt garantiert gleisch ärüwwer
Sie: Da gugg, die alt Kempf hat’er schon abkassiert
Er: Jetzt kimmt’er zu uns, wette
Sie: Do kannst aan druff lasse
Er: Was hab isch gesaacht, der kimmt
Sie: Na, Herr Schäfer, widder ma uff Sammeltour?
SchäfEr: Iss ja für än guude Zweck
Sie: Was mache’se eischendlisch mit dem Geld?
Schäfer: Ei, isch nix, awwer des kimmt alles äm guude Zweck zuguude
Sie: Zum Beischpiel?
Schäfer: Was waas dann isch, Juchendawweit, Krankehilfe, Schuldeberatung
Sie: Pflesche aach?
Schäfer, Ei, isch denk schon, ‘s Elend iss ja üwwerall
Sie: Awwer mir ham doch ä Pflescheversischerung, ‘s wird aam ja jede Monat von de Rente abgezooche
Schäfer: Was waas dann isch, isch sammel doch nur
Sie: Wenn mer sammelt, dann sollt merr schon wisse vorfür merr sammelt
Schäfer: Hauptsach für än guude Zweck
Er: Zeisch ma deu Liste her, isch will ma sehe was die annern gegewwe hawwe
Schäfer: Bitte sehr
Er: Do gugg nur Trude, was die alt Kempf gegewwe hat, zehe Euro
Sie: Unn die Schneidern, gugg, aach zehe Euro
Er: Isch hab aber jetzt gar kaan Zeheeuroschein in meim Bortmonee
Sie: Was hasde dran drinn?
Er: Ei, nur ä Zwaaeurostück
Sie: Herr Schäfer, dess iss awwer aach ä Pech, hier sinn zwaa Euro, Klaavieh mäscht aach Mist
Schäfer: Jedes bissi hilft – noch ä Unnerschrift un dann än scheene Daach noch
Sie: Ihne aach
Er: Bis zum nächste Jahr
Sie: Zwaa Euro sinn noch zuviel für die Bande
Er: Die sammeln doch nur, damit die Chefs von de Caritas sisch ma widder neue Möbel für ihr Büro kaafe kenne
Sie: Oder än neue Dienstwaache, mit dem se dann aach privat fahrn könne
Er: Na, mit zwaa Euro komme die awwer ned weit
Sie: Solle se doch laafe
Er: Genau – wie häsd’s so schä?
Sie: Wie?
Er: Brot für die Welt – awwer die Worscht bleibt hier
Sie: So isses!
(Diese Kurzgeschichten sind auch in einem Buch zu haben – hier klicken -)