The-Short-Story

von de Ginder (copyright)

Sie: Da gugg nur, die Winklern fährt schon widder mit’m Auto zum eukaafe
Er: Scheinbar iss des Benzin immer noch zu niedrisch

Sie: Wohnt gleisch um die Eck unn zu faul zum laafe. Von mir aus könnt des Benzin werklisch fünf Euro koste
Er: Kaa Wunner, wenn die Atmosphär sich dauernd uffhitzt, wenn jeder Depp jeden Meter mit’m Auto zurücklescht

Sie: Waasde noch, wie mer früher zum Kerschepflücke bis nach Alzenau mit’em Fahrrad gefahrn sinn?
Er: Des war’n hie unn zurück glatt achtzisch Kilometer – unn des an aam Daach

Sie: Un heut? Heut wern die Brötscher mit’em Auto geholt – mer iss ja so bequem
Er: Isch bin ja kaan Griine, aber do unnerstütz isch die mit de Ökosteuer

Sie: Ökosteuer, en bleedere Name hätte die sich ned eufalle lasse könne
Er: Was mache die Rote in Berlin dann, wenn die Autofahrer werklisch wenischer fahn däde?

Sie: Die däde blöd gugge mit ihrne Steuereunahme unn däde die Ökosteuer noch höher schrauwwe
Er: Awwer die schrauwwe se doch ädauernd ähoch

Sie: Des iss ä Spiral ohne End unn am End kost des Benzin werklisch fünf Euro
Er: Dodegeesche hilft nur aans

Sie: Ei was dann?
Er: Ned wenischer fahrn, sonnern mehr

Sie: Du maanst, je mehr gefahrn werd, desto mehr nemme die eu unn dann langt dene des, was die an Ökosteuer eunehme
Er: So gesehe hat die Winklern ja rescht, wenn se zum Brötscherhole mitem Auto fährt

Sie: ‘S hat halt alles seun Grund, genauso des mit dem Pfand uff Blechdose
Er: Pfand uff Blechdose, des iss doch Schwachsinn

Sie: Des iss doch kaan Schwachsinn, do steckt en tiefere Sinn drin
Er: Ja, den, daß die Drecksäu ihre Dose ned mehr in die Landschaft schmeisse

Sie: Des ja aach, awwer ‘s geht do ja aach um Umweltressource
Er: Um was?

Sie: Ei, um des, daß die Herstellung von Dose Energie verschwendt, unn bei Mehrwegflasche kann mer halt immer wieder nachfülle
Er: Ei, wolle die dann die Dose widder nachfülle? Des will isch sehe, wenn in aaner Dos än Knick drin iss, wie die die widder grad kriesche

Sie: Dabbes, die wolle doch mit der Pfandmethod die Industrie nur zwinge uff Mehrweg umzusteische, weil des mit dem Pfand dene dann zu lästisch wird
Er: Des iss aach orsch lästisch, wenn de jed Dos widder zurückbringe mußt

Sie: S’s werd net lang dauern, dann gibt’s aach Pfand uff Dosesuppe
Er: Oder uff Essischflasche

Sie: Dene werd schon noch was eufalle
Er: Do fällt mer eu, daß mer gar kaa Bier mehr im Keller hawwe

Sie: Isch hab der doch vom Aldi fünf Dose Bier mitgebracht
Er: Die Pissbrüh schmeckt doch ned. Bier muß merr aus Flasche trinke

Sie: Jetzt denkst de schon wie die in Berlin
Er: Do kann merr ma sehe, uff welcher geistischen Wellenlinie isch mit dene Schlaumeier dort leie

Sie: Ja, die wern disch noch als Berater eustelle
Er: Zeit hätt isch ja

Sie: Wenn de so viel Zeit hast, dann mach disch ma ab in de Gadde, de Rase müßt ma gemäht wern unn unne stehe än ganze Stall voll leerer Flasche, die müßte ma zum Contäner
Er: Apropo Contäner unn Flasche, in dem Big Brasser Haus do in Köln liss aach ä Schwein ärumgelaafe

Sie: Nur aans?
Er: Konrad hies des

Sie: So’n Schweinkram gugge mir uns awwer ned aa. Nochher kimmt än scheene Tierfilm
Er: Unn was hawwe se gefilmt
Sie: ‘S Brunftverhalde von Wapiti in Nordamerika
Er: Du werst mer doch ned uff dumme Gedanke komme

Sie: Wenn isch uff dumme Gedanke komme, dann merkst du des schon, wenn isch meu spezielles Parfüm uffsprüh
Er: Awwer wenn isch des Aldibier getrunke hab, nutzt aach deu Parfüm nix mehr

Sie: Wieso?
Er: Do verfällt mer schnell in de Aldi- Bierdoseschlaf

Sie: Isch versprech derr, isch kaaf dodefo nix mehr
Er: War des jetzt ä Drohung oder ä Verspresche?

Sie: Sei ned so fresch
Er: Isch bring ma die Flasche weg

Sie: Awwer pass uff, daß de die rischdische Flasche ins rischdische Farbloch schmeisst, ‘s letztema, als isch dodebei war, hasde in Gedankelosischkeit ä grii Flasch ins braune Loch geschmisse

Er: Do war isch ja aach mit meune Gedanke wo anners
Sie: Wo warsde dann do?

Er: Beim Brunftverhalde von Wapiti
Sie: Alder Lüstling, mach disch ab zum Contäner