Die Fenstergucker: Schwarzawweider
von de Ginder (copyright)
Sie: Da gugg, die Koch kehrt schon widder die Gass
Er: Des muß ä Hobby von der seu
Sie: Soviel Dreck gibt’s doch ned, daß die jeden zweide Daach kehrt
Er: Reinlischkeitstick
Sie: Isch würd eher saache, daß die ned mehr ganz klar im Owwerstübscher iss
Er: Letzt hat die sich ja rischdisch tierisch uffgerescht
Sie: Ei, wieso dann des?
Er: Do iss aaner gescheüwwer zu Besuch gekomme, und hat der während dem kehrn ä Zigarrettekipp vor de Besen geschnippt
Sie: Un?
Er: Un da iss die ausgerast!
Sie: Was dest dann du saache, wenn de im Schützeverein aaleschsd und kurz vorm Schuss läßt anner en Osterhaas mit Batterie vor deuner Naas tanze?
Er: Jetzt hör awwer uff, was’n des für än Vergleisch?
Sie: Ei, isch maan halt nur, Hobby iss Hobby, un da sollt mer kaan störn
Er: Jedenfalls hat die tierisch aagefange zu plärn
Sie: Un?
Er: Die hat den mit de üwwelste Beleidischunge beleidischt
Sie: Was hat die dann gesaacht?
Er: Soll isch des werklisch wiederhole?
Sie: Awwer ä bissi plötzlisch, wenn isch bitte derf!
Er: Die hat zu dem gesaacht: Ihr scheiss Kippe kenne se gefällischst mit zu dene nemme, die se besuche. Un dann hat se die Kippe uff die anner Straßeseit gekickt
Sie: Gekickt?
Er: Wie de Ballack bei Bayern
Sie: Un wie ging des weider?
Er: Der hat der en Vochel gezeischt und hat sisch
umgedreht
Sie: Rotzlöffel die junge Leut heutzudaachs
Er: Du, des war kaan Junge, des war en Alde
Sie: Do kann mer ma sehe, was solle die Junge eischendlisch von de Alde lerne?
Er: Des iss ä bereschdischd Fraach
Sie: Do gugg, de Jäscher, der alde Schwarzawweider
Er: Geht bestimmt ins Neubauviertel, un verdient sich än schiefe Hals
Sie: Die Fliesselescher, so hab isch gehört, dede schwarz mindestens zwanzisch Euro die Stunn kasiern
Er: Mehr, viel mehr, ei die weil die nach Quadratmeter abreschne. Do komme die schnell uff verzisch Euro die Stunn
Sie: Sauerei, den Staat so um seu Einahme zu betrüche
Er: Des iss ja des Dilema heutzudaachs, jeder steckt in seu Tasch und kaaner denkt mer an die Allgemeinheit
Sie: Dede die uff ihrne Zusatzeukomme Steuern zahle, hätte mer ned so viel Schulde
Er: Un ned so viele Awweitslose
Sie: Ei sischer, do däde die gor ned erst uff so Ideeje komme, wenn die die Samsdachsawweit versteuern müßde
Stimme aus dem Hintergrund: So Leud, isch bin ferdisch
Sie: Un, alles erledischd?
Stimme aus dem Hintergrund: De neue Wasserhahn troppd garantiert die nächsde 5 Jahr ned mehr
Sie: Un was krieschsde jetzt?
Stimme aus dem Hintergrund: Na, weil ihr’s seid fünf- undzwanzischzig Euro
Sie: Na, des läßt sisch hörn. Wen isch de Wombacher aagerufe hätt, hätte mer bestimmt des Dreifache bezahlt
Stimme aus dem Hintergrund: Ei bestimmd, wenn’s langt!
Sie: Da sinn deu fünfundzwanzisch Euro. Un isch dank der aach schee, daß de gleisch gekomme bist.
Stimme aus dem Hintergrund: Keine Ursache, so Kleinischkeide mache mer doch gleisch
Sie: Komm, isch bring disch noch zur Tür….
Er: Der iss escht uff zack, de Walter
Sie: ‘S immer gut, wenn mer so sei Leud kennt
Er: Stell derr vor, mir müßte jedesmal ä Firma aarufe
Sie: Des stell isch mer liewwer ned vor
Er: Do könnde mer gleisch unser Rente uff’s Konto von de Handelskammer üwwerweise
Sie: Des könnt dene so passe
Er: Holzauge!