Die Fenstergucker: Wie’s Elend dursch die Geschend leeft
von de Ginder (copyright)
Sie: Do gugg ä eschdes Kamel bei uns uff de Gass
Er: Was steht da uff dem Schild von dem Kamel, isch hab mei Brill ned uff?
Sie: Zirkus Rocalli
Er: Iss bestimmt en Schreibfehler un muß Roncalli heiße
Sie: Nee du, des glaab isch ned. Die klaane Zirkusse, die nenne sich immer so ähnlisch wie die grosse Zirkusse
Er: Ach so, um die Leut zu täusche
Sie: Damit wenischsdens ä paar Leud in dene ihrne Vorstellunge gehe
Er: Heutzutachs hawwe die Leut ja ganz annere Vorstellunge von Unnerhaltung
Sie: Des Fernsehe mäscht so klaane Unnernehmunge wie so än Zirkuss ja kaputt
Er: Dadebei iss ja so ä Liveerlebnis was ganz anneres, als so ä Geflimmer uff de Mattscheib
Sie: Un was noch dodezu kimmt iss, daß die Leut heutzutachs viel zu bequem gewornn sinn – es wird kaan Schritt zu viel vor die Tür gemacht
Er: Awwer sinn mer doch ma ehrlisch, wenn alle vier Monat än annern Zirkus uff’m Festplatz steht, wer had do noch groß Lust do hiezugehe?
Sie: Des stimmt aach wieder. Un was iss des End vom Lied?
Er: Was?
Sie: Na, dann stehe se de halbe Winter wieder mit de Büchs un em halbtote Lama in de Fussgängerzon und bettele die Leut aa
Er: Die hänge halt an ihr’m Zirkus, die Leut
Sie: Dedst du disch uff die Gass stelle, wenn de ä Lederwarnbabscherbud hättst un nix mehr verkaafe dedst?
Er: Do müßt isch de Lade zumache, wieso?
Sie: Ei, do hammers doch – die awwer mache ihrn Lade aafach ned zu, liewwer gehe die uff die Gass oder gehe klaue
Er: Stimmt, de Müller Heiner hat mehr gestern erzählt, daß se beim Kohlejäscher ihrne Tankstell eugebroche wärn.
Sie: Siehste, die sinn kaan Daach do un schon geht’s mit der Klauerei los
Er: Fehlt nur noch, daß die Zigeunerbagasch mit ihrne Wohnwaache widder uff de Sommerwies kampiert, do könnde die Geschäftsleut komplett zumache
Sie: Un mir könnte’s Haus verrammele
Er: Gott sei Dank iss der mit seim Kamel außer sichtweite, mer kanns gar ned mehr mitaasehe, des Elend, wie’s dursch die Geschend leefd
Sie: Do gugg, der Kerl do driwwe klingelt an alle Häuser
Er: Bestimmt irschend so än Zeidungswerwwer
Sie: So aaner fehlt mer grad noch, die lüsche wie gedruckt
Er: Stimmt, die verkaafe ja aach Druckerzeuschnisse
Sie: Gugg, jetzt kimmt der Kerl uff unser Straßeseit ärüwwer
Mann: Guten Tag
Er: Guude
Sie: Tach
Mann: Ich komme vom Zirkus Rocalli und wollte sie fragen, ob sie nicht eine kleine Spende für uns haben
Sie: Sie, mir ham nur ä klaa Rente
Mann: Die Tiere haben nicht mehr viel zu beißen, ich bitte sie, geben sie ihrem Herz einen Stoß
Sie: Fraache se ma uff’m Wiesehof nach, vielleischt hawwe die ä par Balle Heu üwwerrisch
Mann: Na dann, nix für ungut
Er: Schöne Tach noch
Sie: Den wär mer los
Er: Von wesche Geld für Futter. Am nächste Wasserhäusje wird do doch erst ma ä Biersche gekippt
Sie: Des wär ja aach noch schenner, wenn mer die Klauer unnerstütze dede
Er: Solle was gescheides schaffe gehe, bräuchte se aach ned ärumzubettele
Sie: Komm, isch kann des Elend nemmer sehe, gugge mer Fernseh
Er: Was kimmt dann heut?
Sie: Bei Britt hawwe se heut des Thema “Dein Suff treibt uns in den Ruin”
Er: Interessantes Ding
Sie: Maan isch awwer aach