Eufriere lasse
von de Ginder (copyright)
Willi: Wenn mer an nix Schlimmes denkt
Heiner: Kimmd de Willi ogerennd
Willi: Guude
Heiner: Aach guude
Willi: Un, wos gehd der dann so im Kopp ärum?
Heiner: Isch üwwerlesche, ob isch misch nooch meim Dod eufriere lasse soll
Willi: Nach deim Tod?
Heiner: Ei vorher bestimmd ned
Willi: Un fahrn die disch dann nach Grönland zum eufriere oder kimmsde dehaam in die
Gefriertruh?
Heiner: Hannebambel – isch werd dann nach Ameriga gefloche und dord komm isch in en Stickstoff-Sarsch
Willi: Des wird awwer ned billisch
Heiner: Mer gönnt sich jo sonst nix noch seim Dod
Willi: Hosd jo reschd, die Errwe verbrasse eh dei mühsam Erspardes
Heiner: Du saachsd es, do is so ä Eufriererei genau des Rischdische
Willi: Un warum willsde disch dann eufriere lasse nach deim Dod?
Heiner: Ei Willi, in hunnerd oder zwaahunnerd Jahr, da is die Teschnik vielleischd so weid, daß die aan widder uffwecke kenne
Willi: Stell der vor die wecke disch uff, un ham de Waachner Kurt sei Wertschafd abgerisse und die ganz Menscheid hat sich vom Alkohol losgesaachd?
Heiner: Des wär ä Kadastroph
Willi: Wasde wos ä werklisch groß Kadastroph wär?
Heiner: Naa
Willi: Stell der vor, du kimmsd nach deim Tod ins Paradies, du lebst in Saus und Braus, ä
paar hübsche Mädscher im Arm und du wersd dann uffgeweckd
Heiner: Isch glaab isch üwwerlesch mer des mit dem Eifriere noch emol
Willi: Word emol, wasde was die allergrößd Kadastroph wär?
Heiner: Naa
Willi: Wenn sisch die Alde aach had eufriern lasse un wird mit dir zusamme gleischzeidisch uffgeweckd
Heiner: Guud, hasd misch üwwerzeuschd, des lasse mer dann doch besser
Willi: Geh mer liewer gleisch jetzd ins klaa Paradies
Heiner: Waachner Kurt?
Willi: Waachner Kurt!
Heiner: Geh mer
Willi: Na, dann nix wie ab