Feindlische Üwwernahme
von de Ginder (copyright)
Feindlische Üwwernahme
Willi: Guude
Heiner: Aach guude
Willi: Saach ma
Heiner: Wos?
Willi: Sach ma, wos is dann eischendlisch ä feindlisch Üwwernahm?
Heiner: jedenfalls kaa friedlisch Sach
Willi: Spaßvogel – isch kapier des aafach ned
Heiner: Soll isch der des ämol erkläre?
Willi: Ei freilisch, hätt isch sonst gefraachd?
Heiner: Also dann bass ämol uff
Willi: Isch spitz die Ohrn
Heiner: Isch verdeutlisch där des am besde an em Beispiel bei dir dehaam
Willi: Guud
Heiner: Also wenn du dehaam des Saache hasd un du de Chef bist, dann hasd du sozusaache des alleinische Stimmreschd
Willi: So is des ja aach bei mir dehaam
Heiner: Wenn där awwer dei Erna so klammheimlisch a Zugeständnis
nachem annern abringt oder du so langsam zu allem ja un Amen sächsd, dann
verschwind die Audoridäd so klammheimlisch
Willi: Du maanst mer muß do verdammd uffpasse
Heiner: Do muß mer verdammd uffpasse, daß aam die Weiwwer ned uffm
Kopp rumdanze
Willi: Wie beim Sattler Schorsch
Heiner: Wie beim Sattler Schorsch, der hod sei feindlisch Üwwernahm schon hinner sich – der muß zu allem nicke
Willi: Jo, der hat nix mehr zu melde
Heiner: Genau, isch glaab du hasd es kapierd, oder?
Willi: Ei sischer Heiner – Null Kombromisse, kaa Schwachstelle zeische
Heiner: Un nie nachgewwe
Willi: Nie
Heiner: sonst kannsde där die Bierscher bei de Sportschau abschminge
Willi: Un de Keschelowend am Freidaach
Heiner: Do kannsde nur noch am Monatserste die Kohle uff de Disch lesche und dann hasde die Klapp zu halde
Willi: Guud, daß isch disch als Freund hab
Heiner: Ei wozu sinn Freunde dann do?
Willi: Isch dank der aach schee und machs guud
Heiner: Machs besser