Freistellungsufftraach
von de Ginder (copyright)
Willi: Schau Schau
Heiner: Guude
Willi: Un alles paletti?
Heiner: Nix paletti
Willi: Wos´n los?
Heiner: Ei, isch wor eewe uff de Bank und wos ham die gemacht?
Willi: Die ham der´s Kondo geschperrt
Heiner: Nee du, viel schlimmer
Willi: Viel schlimmer?
Heiner: Isch hab do von de Oma ihr´m Sterbegeld en Schparvertraach ogelescht un die Säck ham mer jetzt von dene Zinse aafach wos abgezooche
Willi: Aafach so, wieso dann des?
Heiner: Die saache, isch häd kaan Freistellungsufftraach abgegewwe
Willi: Ei wos is dann des, en Freistellungsdingsbums
Heiner: Ei, des is ä Stück Papier, wo druffsteht, daß de kaa Zinse abgezooche krieschst
Willi: Awwer Heiner, warum hasde dann des Papiersche ned abgegewwe?
Heiner: Ei Du bist mer aaner, woher soll isch dann wisse, daß isch des Formulärscher abgewwe muß?
Willi: Ä guud Fraach – isch häd jo aach kaan´s abgegewwe
Heiner: Siehsde, mit de Dumme mache die ihr Geschäfde
Willi: Un wern immer reischer die Banke
Heiner: Dabbes, waast dann du ned, daß die abgezoochene Zinse ans Finanzamt gehe?
Willi: Ei woher dann?
Heiner: Die kassiert de Staat eu, hod mer der am Schalder gesaacht
Willi: Frechheit, als deen die ned schon genuuch von unser aanem abzieje
Heiner: Immer de klaane Leut
Willi: Un wieviel ham die der dann abgezooche du klaaner Leut?
Heiner: Fuffzig Märker
Willi: Ä Freschheit
Heiner: Kannsde laud saache
Willi: Un do kammer nix mehr mache, um des widder zurückzukriesche?
Heiner: Kammer schon
Willi: Un wos?
Heiner: Mer muß en … Moment, isch hab mers uffgeschriwwe … mer muß en Lohnsteuerjahresausgleisch mache und do die Anlaache KSO ausfülle
Willi: Anlaache KSO, des klingt wie “Keschelanlaache Keschler Schportverein Oberrad”
Heiner: Jedenfalls soll isch so´n Papierkram mache
Willi: Lohnt sisch des ned, so ä bissi Papierkram und dafür gibt´s Fuffzisch Märker?
Heiner: Ei isch mach doch kaan Lohnsteuerjahresausgleisch
Willi: Ei warum dann ned?
Heiner: Ei do däde die mer noch druffkomme, daß isch Mieteunnahme hab
Willi: Du maanst die Hütt, die de geerbt host von daane Dande?
Heiner: Genau die Hütt maan isch
Willi: Un dodefer dede die der aach noch Steuern abzieje?
Heiner: Eiskalt
Willi: Heiner, isch muß saache, du bist en verdammt klewwere Kerl
Heiner: Hä?
Willi: Ei, du lescht dene vom Finanzamt en Fuffzischer uffn Disch und die …
wieviel Miet kassiersde?
Heiner: Zwaadausent Märker de Monat, awwer des bleibt unner uns
Willi: Ehrenwort unner Freunde
Heiner: Sonst hätt isch der´s aach ned erzählt
Willi: Isch bin halt vertrauenswürdisch
Heiner: Bist jo mein besde Kumbel
Willi: Klor, awwer isch wollt saache, du lescht dene en Fuffzischer uff´n
Disch und die lasse sisch defo blende und gugge ned nach daane Miedeunahme
Heiner: Wenn mer´s so sieht hasde rescht
Willi: Saustark
Heiner: Klewwer muß mer sei
Willi: Na dann machs guud
Heiner: Machs besser