Gallestaa
von de Ginder (copyright)
Willi: Ei de Heiner, wie dann?
Heiner: Guude – schlescht
Willi: Wieso dann des?
Heiner: Isch komm grad vom Dokder
Willi: Un wos´n los?
Heiner: Isch muß operiert wern
Willi: Och komm
Heiner: Ei, wenn isch ders doch saach
Willi: Un, wos hasde dann?
Heiner: Gallestaa
Willi: Des iss doch heutzudaach kaa Problem mehr – die nemme de Leeser und zertrümmern die Dinger
Heiner: Doch ned bei uns hier im Heilisch Geist Krankehaus
Willi: Du maanst die mache des nach herkömmlischer Method?
Heiner: Uffschneide un gugge, wo die Dinger sinn
Willi: Des is blöd
Heiner: Saublöd
Willi: Saach ämol, wo bilde sisch dann eischendlisch so Gallestaa?
Heiner: In de Galle, du Debbes
Willi: Doher der Name Gallestaa
Heiner: Du host´s erfasst
Willi: Un wozu braucht der Mensch ä Gall?
Heiner: Wos waas dann isch, ärscher misch ned
Willi: Vielleischt braucht mer die Gall grad zum ärschern
Heiner: Könnt sei
Willi: Ei, mer seescht jo “do kimmt mer die Gall hoch”, wenn mer sisch
ärschert
Heiner: Ned dumm – du jetzt waas isch aach, woher isch die Gallestaa hab
Willi: Ei woher dann
Heiner: Von maaner Hermi – die hod misch zu viel geärschert
Willi: Könnt sei, dann hätt isch awwer aach Gallestaa
Heiner: Bestimmt hast du aach welsche, mußt disch jo aach dauernd üwwer dei
Erna ärschern
Willi: Isch lass misch awwer ned uffschneide
Heiner: Werd der nix anners üwwerisch bleiwwe
Willi: Maan Kusseng sein Bruder sein Kumbel, der iss in de Schirurschie in de
Universidädsklinik tädisch – do geh isch hie – do werd ned geschnibbelt
Heiner: Kannsde den ämol fraache, ob der für misch aach noch en Platz hod?
Willi: Ei Heiner, sischer, do gehe mir zusamme unnern Leeser
Heiner: Un anschließend zusamme in die Klinik-Cafederia
Willi: Ob die aach Bier ham?
Heiner: Bestimmt nur die Pissbrüh von Alkoholfreiem
Willi: No, do werd halt wos mitgenomme
Heiner: Sixpäck
Willi: Sixpäck links, Sixpäck reschts
Heiner: Lang werd jo so´n Eugriff ned dauern, vielleischt sinn mer bei dem
Leesern jo awwends schon widder dehaam
Willi: Muß jo ned sei, mer könnt sisch jo ä bissi erhole dort
Heiner: Du maanst von dene hübsche Krankeschwestern pflesche lasse
Willi: Genau
Heiner: Aa Woch bleiwwe mer schon drin
Willi: Jo do könne mer uns jo noch ä paar Lewwerflecke wegleesern lasse
Heiner: Saach mo
Willi: Wos dann?
Heiner: Saach mo, kann dann bei dem Leesern aach nix schiefgehe?
Willi: Wos soll dann do schiefgehe?
Heiner: Wenn die zum Beischpiel ausversehe so en Nerv treffe un des Verlange
nach Äppelweu und Bierscher is plötzlisch weg
Willi: Des wär fatal
Heiner: Stell der ämol vor, du kimmst zum Waachner Kurt und der fräscht
disch, wos de trinke willst und du sächst “En Milschschejk”
Willi: Der lacht sisch dod
Heiner: Der werfd sisch weg
Willi: Du des mit dem Leeser, des üwwerlesch isch mer nochämol
Heiner: Isch aach
Willi: Na dann machs guud
Heiner: Machs besser