Tokschoo
von de Ginder (copyright)
Willi: Gries disch
Heiner: Ei, wie dann?
Willi: Ganz guud
Heiner: Schee zu höre
Willi: Du, isch bin aach bald inner Tokschoo zu sehe
Heiner: Och komm, du doch ned
Willi: Ei wenn isch ders sach, isch hab misch beworwe
Heiner: Fliesche?
Willi: Nee isch fahr mit de Bahn
Heiner: Dussel, isch maan doch, ob de zu dem Pfarrer Fliesche gehsd?
Willi: Nee, ned zu dem
Heiner: Ei wo gehsde dann dann hie?
Willi: Pro Siwwe
Heiner: Türk
Willi: Nee, Arabella
Heiner: Isch wolld ned wisse, in wos für em Hotel du üwwernachsd, sondern wos für Sendung des is
Willi: Ei saach isch doch – Arabella Kiesbauer
Heiner: Jetzt hods Klick gemachd – Thema?
Willi: Macht sie ihre Frau krank?
Heiner: Seid wann saachsd du sie zu mir?
Willi: Na, so haast des Thema
Heiner: Ach so, awwer ä inderessandes Thema, kennt isch glatt aach mitmache
Willi: Ei do mach doch mit
Heiner: Ja wann is dann die Sendung?
Willi: Erst musde emol zum Kaasding
Heiner: Wos is dann des?
Willi: Ä Vorstellungsgespräsch
Heiner: Die nemme wohl ned jeden
Willi: Ei Heiner, was dengst dann du, die nemme nur die Krankeste
Heiner: Un du glaabst, du gehörst zu dene, die am beste von ihre Alde krank gemachd wern?
Willi: Awwer des waasd du doch, wie krank misch die Erna meschd
Heiner: Ok, isch mach der en Vorschlach – isch bin jetzd aaner von Pro Siwwe un fraach disch un du mußt antworde, mol see, ob du zu de beste Kranke gehörsd
Willi: Ei do fraach emol
Heiner: Saache se emol, warum machd ihrne Fraa sie krank?
Willi: Des schlimmsde is des ewische Genörschel
Heiner: Ei, an wos nörscheld die dann erum?
Willi: Wenn isch misch emol ä bißje ausruhe will un misch uff die Kautsch lesch, kimmd die sofort un säschd: Willi, de Hund muß Gassi
Heiner: Un des stört sie?
Willi: Ei des machd misch krank, die hod doch Zeit genuch, um mit der Döhle raus zu gehe
Heiner: Verstehe, un was iss noch so?
Willi: Wenn isch emol in ruh mei Zeidung lese will, kimmd die garandiert zwaa Minude späder und säschd: Willi, wann räumsde dann endlisch die Garasch uff?
Heiner: Erzähle se emol weida
Willi: Wenn isch misch dann in de Gaarde zurückzieh, um Luft zu schnappe und misch uff des klaane Gardebänkscher setz und de Vöschelscher beim zwischern zuhör, do kimmd die un fräschd misch, wann isch dann endlisch de Rase mähe ded
Heiner: Un wie machd sich nun des uff ihr Gesundheid bemerkbar?
Willi: Des ewische Genörschel machd misch ganz träge, mer hod gor kaa Lust mer wos zu mache.
Heiner: Verstehe
Willi: Mer is direkt en Herzinfaktkandidat, dauernd wird mer durch die Geschend gehetzt, des geht uffs Herz kann isch der saache
Heiner: Ei Willi, du hasd es werklisch ned leischd, wenn isch emol saache derf
Willi: isch dank der aach fier dei Mitgefiel
Heiner: Isch kenn des – du hosd erzähld, als wärs von mir
Willi: Ehrlisch?
Heiner: Ehrlisch
Willi: Heiner, mir misse zusammehalde, sonst mache uns unser Weiwwer ferdisch
Heiner: Mir halde zusamme, wie Pech un Schwermedall
Willi: Jo, dann gehe mir jetzd ins Fitnessstudio
Heiner: Wohi?
Willi: Waachner Kurt – Kneipkur
Heiner: Awwer sofort – do is kaa Zeit zu verliere
Willi: Geh mer
Heiner: Auf gehds