Valentinstag
von de Ginder (copyright)
Willi: Ei, de Heiner
Heiner: Ei, de Willi
Willi: Du Heiner, waasd du schon, wos de deuner Fraa zum Valentinsdaach schenkst?
Heiner: Valentinsdaach, wos´n des?
Willi: Ei Heiner, wos waas dann isch.
Heiner: Frach isch disch oder du misch?
Willi: Schon gut, resch disch widder ab. Üwwerall in de Zeidung un uff Plakade liest mer doch des von dem Valentinsdaach und das mer do seune Geliebde ä klaa Uffmerksamkeit schenke soll.
Heiner: Du host doch gor kaa Geliebde, oder?
Willi: Dabbes, meu Erna iss doch do demit gemaand.
Heiner: Ach, Ehefraue zähle do aach dezu, wußt isch gor ned.
Willi. Ei Heiner, du liebst doch deu Hermi, oder ned?
Heiner: Ei sischer lieb isch meu Hermi, awwer wos hod des mit dem bleede Valentinsdaach zu dun?
Willi: Eischendlisch nix
Heiner: Ewwe
Willi: Awwer die Weiwwer wolle an dem Daach beschenkt wern
Heiner: Wer säschdn des?
Willi: Ei die Anzeische do uff dene Plakade un im Fernsehn
Heiner: Awwer mir falle doch schon lang ned mehr uff so Werbung ereu, oder?
Willi: Ei mir ned, Heiner, awwer unser Weiwwer schon und wenn die dann nix geschenkt kriesche, dann iss dehaam die Höll los
Heiner: Die iss doch aach sonst immer los
Willi: Wenn de des so seeschsd, hosde aach widder reschd
Heiner: Wesche aam Daach kaa Höll, geb isch doch ned gleisch fuffzisch Märker aus
Willi: Die kann mer jo aach viel besser olesche
Heiner: Du maanst hochprozentisch verzinse?
Willi: Grüne Baum heesd des Stischwort
Heiner: Geh mer, awwer aa Fraach hab isch noch
Willi: Ei, äraus demid
Heiner: Wieso haasdn der Daach eischendlisch Valentinsdaach?
Willi: Ei, do werd de Karl Valentin geborn seu
Heiner: Könnt seu, awwer warum gibds dann kaan Heinz Erhardtdaach?
Willi: Iss hald noch kaaner druffgekomme
Heiner: Müsse mer mo dene Werbefuzzi vorschlaache, dann wern mir mo an dem Daach beschenkt
Willi: Du maanst Valentinsdaach iss wie Mudderdaach und Erhardtdaach wie Vadderdaach?
Heiner: Genau. Awwer wenn isch mers so üwwerlesche, du hosd jo es Stischword gegewwe, mer könnt jo aach aus Rationalisierungsgründe de Valentinsdaach un de Mudderdaach zusammelesche, wos hälsdn dodevo?
Willi: Ned dumm, zwaa Klappe mit aaner Fliesche gefange
Heiner: Kannsde mo sehe, wos Äppelwoi für geistische Zone freilesche dud
Willi: Auf, dann geh mer jetzt geistische Zone freilesche
Heiner: Grüne Baum
Willi: Waachner Kurt, geh mer